இணைய வாசகர்களுக்கு இனிய வணக்கங்கள்!! இணையத்தில் படித்ததை உங்களுடன் பகிர்ந்து கொள்கின்றோம். அறியாததை அறிந்து கொள்வோம்.
ஐயப்ப பக்தர்கள் என்னென்ன செய்யக்கூடாது?
கார்த்திகை மாதம் என்றாலே பக்தர்கள் சபரிமலை ஐயப்பனுக்கு மாலை அணிந்து, விரதம் இருக்க தொடங்கிவிடுவார்கள்.அந்த வகையில் விரதம் இருக்கும் ஐயப்ப பக்தர்கள் என்னென்ன செய்யக்கூடாது? என்பதை பற்றி பார்க்கலாம்.
மாலையணிந்த பின் சந்திக்கும் ஆண்களை ஐயப்பா என்றும், பெண்களை மாளிகைப்புறம் என்றும், சிறுவர்களை மணிகண்டன் என்றும், சிறுமிகளை கொச்சி என்றும் அழைக்க வேண்டும்.
மலைக்கு யாத்திரை புறப்பட சில நாட்களுக்கு முன்னர் விரிவான முறையில் பஜனை, கூட்டு வழிபாடு, பூஜை முதலியவற்றை நடத்தி எல்லோருக்கும் பிரசாதம் வழங்கி உணவளிக்க வேண்டும்.
இருமுடி கட்டும் பூஜையை குருசாமி வீட்டிலோ, கோவிலிலோ நடத்தலாம். கணபதியை பிரார்த்தித்து பெற்றோரை வணங்கி, ஐயப்பன் நாமத்தை சொல்லி கொண்டே கட்டு நிறைக்க வேண்டும்.
யாத்திரை புறப்படும்போது இருமுடியை தலையில் தாங்கி, வீட்டு வாசலில் ஐயப்பனை பிரார்த்தித்து கொண்டு தேங்காயை உடைத்து விட்டு சரணம் சொல்லி, போய் வருகிறேன் என எதுவும் கூறாது திரும்பி பார்க்காமல் செல்ல வேண்டும்.
யாத்திரை புறப்பட்டதில் இருந்து கன்னி சாமிமார்கள் இருமுடியை தாமாக ஏற்றிக்கொள்ளவோ, இறக்கவோ கூடாது. குருசாமியின் கையாலோ அல்லது பலமலை சாமியின் கையாலோதான் அதை செய்ய வேண்டும்.
யாத்திரை முடிந்ததும் பிரசாதங்களை ஏந்தி வந்து, வீட்டு வாசலில் தேங்காய் உடைத்துவிட்டு வீட்டிற்குள் சென்று பூஜையறையில் பூஜை செய்து கற்பூர ஆராத்தி காட்டி, இருமுடி அரிசியை பொங்கி எல்லோருக்கும் கொடுக்க வேண்டும்.
விரத காலத்தில் மாலை போட்ட சாமிமார்களின் வீடுகளை தவிர வேறெந்த வீட்டிலும் ஐயப்பன்மார்கள் உணவருந்தக்கூடாது.
மாலை போட்ட சாமிமார்கள் அதிலும் கன்னி சாமிமார்கள் கண்டிப்பாக பெருவழிப்பாதையில் தான் செல்ல வேண்டும்.
யாத்திரை இனிய முறையில் நிறைவுற்றபின் குருசாமி அல்லது தாயாரின் மூலம் மாலை கழற்றும் போது அவர்கள் சொல்லும் மந்திரத்தை கூறி மாலையை கழற்றி, சந்தனத்தில் நனைத்து ஐயப்பன் திருவுருவ படத்திற்கு முன்னால் வைத்து விட்டு தீபாராதனை காட்டி விரதத்தை முடிக்க வேண்டும்.
பக்தர்கள் கோவிலுக்கு சென்ற பிறகும் வீட்டில் உள்ளவர்கள் விளக்கை தினமும் ஏற்ற வேண்டும். கோவிலுக்கு சென்ற பக்தர்களுக்கு அந்த ஜோதி வழி காட்டுவதாக ஐதீகம். பக்தர்கள் திரும்பி வந்தவுடன் ஜோதி ஏற்றிய இடத்தின் அருகில் தேங்காய் உடைத்து சுவாமியே சரணம் ஐயப்பா என முழங்க வேண்டும். அதன்பிறகே வீட்டிற்குள் செல்ல வேண்டும்.
ஐயனை தரிசிக்க 18 படிகளில் தான் ஏறி செல்ல வேண்டும். தலையில் இருமுடிக்கட்டுடன் படியின் வலதுபுறம் தேங்காய் உடைத்து ஏற வேண்டும்.
இந்தக் கட்டுரை போன்ற பக்திக் கட்டுரைகளுக்கு எமது கலாச்சாரம் பகுதிக்கு செல்லவும்.
